بانگِ درا 159: دریوزۂ خلافت

تعارف

نظم ”دریوزۂ خلافت“ علامہ اقبال کے دورِ ثالث کی ایک غیرت مندانہ اور تاریخی نظم ہے، جو پہلی جنگِ عظیم کے بعد سقوطِ سلطنتِ عثمانیہ کے المیے پر برطانوی حکومت سے خلافت کی بحالی کی اپیلیں کرنے والے وفد کی روانگی کے پس منظر میں لکھی گئی۔

اقبالؔ برصغیر کے مسلمانوں کی خوش فہمی اور سیاسی بھیک پر شدید تازیانہ لگاتے ہوئے فرماتے ہیں کہ اگر ملک ہاتھوں سے جاتا ہے تو جائے مگر احکامِ الٰہی اور ایمانی غیرت کا سودا نہ کیا جائے۔ وہ تاریخی شعور کو جھنجھوڑتے ہیں کہ جس اقتدار کو مسلمان اپنے خون سے نہ خریدیں وہ ان کے لیے سراسر ننگ و عار ہے؛ اور شیخ سعدی کے اس فارسی مصرعے سے بات کا حق ادا کر دیتے ہیں کہ ’ہڈی کا ٹوٹ جانا اتنی شرم کی بات نہیں جتنا دوسروں کے در سے مومیائی (مرہم) کی بھیک مانگنا ہے“۔

مسئلۂ خلافت، سقوطِ سلطنتِ عثمانیہ اور تحریکِ خلافت کے تاریخی پس منظر کی وضاحت کرتے ہوئے پروفیسر یوسف سلیم چشتی لکھتے ہیں:-

اِس نظم کا عنوان ہے دریوزۂ خلافت یعنی ”خلافت کی بھیک“، اس لیے جب تک مسئلۂ خلافت کی مختصر تاریخ نہ لکھی جائے، یہ نظم سمجھ میں نہیں آ سکتی۔ واضح ہو کہ پہلی جنگِ عظیم میں ترکوں کو عربوں کی غدّاری کی بدولت شکستِ فاش نصیب ہوئی، چنانچہ 3 نومبر 1918ء کو انہوں نے غیر مشروط طور پر ہتھیار ڈال دئیے اور مسلمانانِ عالم کے سب سے بڑے دشمن یعنی انگریزوں کی دِلی مراد پوری ہو گئی۔ چنانچہ انگلستان کے وزیرِاعظم نے جب جنرل ایلنبی (General Allenby) فاتح فلسطین کے سینے پر تمغا لگایا تو اُس کی فتح کو ہلال پر صلیب کی فتح قرار دیا اور کہا کہ سلطان صلاح الدین کے ہاتھوں جو شکست ہمیں نصیب ہوئی تھی، اُس کا انتقام اب ہم نے لیا ہے۔

انگریزوں نے ہندوستانی مسلمان کے ساتھ جو جھوٹے وعدے کیے تھے اُن میں سے ایک یہ بھی تھا کہ خواہ کچھ بھی ہو، ترکی کی سالمیت بر قرار رکھی جائے گی یعنی اس کے حصے نہیں کیے جائیں گے۔ لیکن جب دشمنانانِ اسلام کو اپنے مقاصد میں کامیابی حاصل ہو گئی تو انہوں نے شرافت اور انسانیت، ہر چیز کو بالائے طاق رکھ کر ترکی کے خاتمے کا فیصلہ کر دیا اور 1919ء سے اس پر عمل در آمد شروع ہو گیا۔ جب ہندی مسلمانوں نے یہ دیکھا کہ سلطنت ترکی صفحۂ ہستی سے نیست و نابود ہونے والی ہے، تو مجھے اچھی طرح یاد ہے کہ پشاور سے لے کر مدراس تک اور کراچی سے لے کر ڈھاکہ تک، سارے ہندوستان میں صفِ ماتم بچھ گئی۔ مسلمانوں نے سارے ملک میں جلسے منعقد کر کے اپنی ناراضگی کا اظہار کیا اور اُن میں انگریزوں کو ترکوں کی سابقہ ”حماقتوں“ کا واسطہ دیا (تاکہ انگریز ترکی کی سالمیت برقرار رکھنے پر آمادہ ہو جائیں)، مثلاً:-

ا۔ 1799ء میں سلطنتِ ترکی نے سلطان ٹیپو کی امداد کرنے کی بجائے سلطنتِ برطانیہ کی امداد کی تھی یعنی سلطان شہیدؒ کو بھی غلامی قبول کر لینے کا مشورہ دیا تھا۔
ب- 1855ء میں کریمیا (روس) کی جنگ میں ترک اور انگریز دونوں دوش بدوش لڑے تھے۔
ج- 1857ء میں ترکوں نے انگریزوں کو اجازت دی تھی کہ وہ ہندوستانی مسلمانوں کا بسرعتِ تمام قلع قمع کرنے کے لیے اپنی فوجیں مصر کے راستے ہندوستان پہنچا سکتے ہیں۔

ان جلسوں کے بعد دسمبر 1919ء میں خلافت کانفرنس کا اجلاس منعقد ہوا اور اس میں یہ طے پایا گیا کہ جنوری 1920ء میں انگلستان کو ایک وفد روانہ کیا جائے جو حکومتِ برطانیہ سے درخواست کرے کہ خلافت کا خاتمہ نہ کیا جائے، چنانچہ یہ وفد آٹھ مہینے انگلستان رہ کر پچیس ہزار روپیہ ضائع کرکے بے نیل و مرام واپس آیا تھا۔

علامہ اقبالؔ کی نگاہِ دوربیں نے پہلے ہی محسوس کر لیا تھا کہ حکومتِ برطانیہ، جو خود زوالِ خلافت کی سب سے زیادہ آرزو مند ہے اور اس تمام فتنہ کی بانی ہے، وہ بھلا کب ارکانِ وفد کی باتوں پر غور کرے گی۔ اس لیے انہوں نے یہ بلیغ نظم سپردِ قلم کی۔

پروفیسر یوسف سلیم چشتی، شرح بانگِ درا

نظم کے محرکات بتاتے ہوئے مولانا غلام رسول مہر تحریر کرتے ہیں:-

نظم ”دریوزۂ خلافت“ اس موقع پر لکھی گئی جب مولانا محمد علی مرحوم ایک وفد لے کر خلافت کا مسئلہ انگلستان کے وزیرِ اعظم لائیڈ جارج کے سامنے پیش کرنے کے لیے لے گئے تھے۔

مولانا غلام رسول مہر، مطالبِ بانگِ درا

تحریکِ خلافت کے سیاسی نتائج اور اقبالؔ کے دور اندیشانہ موقف پر روشنی ڈالتے ہوئے اسرار زیدی رقم طراز ہیں:-

گذشتہ نظم ”اسیری“ میں تحریکِ خلافت کے ضمن میں اقبالؔ نے جو گول مول رویہ اختیار کیا ہے، اس کی توجیح زیرِ تشریح نظم سے ہو جاتی ہے۔ اقبالؔ تحریکِ خلافت کے حق میں نہیں تھے۔ اُن کا نظریہ تھا کہ اقتدار کوئی بھیک میں نہیں دیتا بلکہ قوتِ بازو سے حاصل ہوتا ہے۔ اس کی واضح مثال پہلی عالمی جنگ میں ترکی پر انگریزوں کا تسلّط اور ہندوستانی مسلمانوں سے اُن کی بدعہدی تاریخی شواہد کے طور پر علامہ کے سامنے تھیں۔

اسرار زیدی، شرح بانگِ درا

سماعت فرمائیے

تشریح

شعر 1

لِنک کاپی کریںتشریح کاپی کریں

اگر مُلک ہاتھوں سے جاتا ہے، جائے
تُو احکامِ حق سے نہ کر بے وفائی

معانی	الفاظ
قبضے سے نکل جانا	ہاتھوں سے جانا
شریعتِ اسلامی، خدا کے احکام	احکامِ حق
اِنحراف، سرتابی، نافرمانی	بے وفائی

تشریح:

علامہ اقبال مسلمانوں اور بالخصوص خلافت کمیٹی کے ارکان کو مخاطب ہو کر کہتے ہیں کہ:-

اگر مُلک (ترکی) ختم ہوتا ہے تو بلا سے ہو جائے، لیکن شریعتِ اسلامیہ سے بے وفائی مت کرو، اگر تم ترکی کی سالمیت برقرار رکھنے کی گزارش لے کر دشمنانِ مِلّت کے سامنے دستِ سوال دراز کرو گے تو گویا اللہ کے احکام کی خلاف ورزی کرو گے۔ واضح رہے کہ اسلام ہمیں غیرت و خود داری کا درس دیتا ہے اور غیرت کا تقاضا ہے کہ دوسروں کے سامنے ہاتھ نہ پھیلائے جائیں۔ بقول اقبالؔ:-

؏ دوسرا نام اسی دِین کا ہے ’فقرِ غیور‘!
(ضربِ کلیم: اسلام)

واضح رہے کہ فکرِ اقبالؔ میں قوّت و شوکت کو بہت اہمیت حاصل ہے۔ چنانچہ فرماتے ہیں:-

؎ ”وہ نبوّت ہے مسلماں کے لیے برگِ حِشیش
جس نبوّت میں نہیں قُوّت و شوکت کا پیام“
(ضربِ کلیم: نبوت)

اسی طرح اپنی ذاتی بیاض (ڈائری) میں رقم طراز ہیں:-

Power is more divine than truth. God is power. Be ye, then, like your father who is in heaven.

ترجمہ: قوت میں صداقت سے زیادہ الوہیت ہے۔ خدا قوی ہے۔ تُو ابھی اپنے اُس خدا کی طرح ہوجا جو آسمانوں میں ہے۔

—Muhammad Iqbal, Stray Reflections (Urdu translation: Mian Sajid Ali)

تحریکِ خلافت: پہلی جنگِ عظیم میں ترکی نے برطانیہ کے خلاف جرمنی کا ساتھ دیا۔ ترکی کی جنگ میں شمولیت سے ہندوستان کے مسلمان پریشان ہوئے کہ اگر انگریز کامیاب ہو گیا تو ترکی کے ساتھ اچھا سلوک نہیں کیا جائے گا۔ ہندوستان کے مسلمانوں نے انگریزوں کا ساتھ دینے کے لیے وزیر اعظم برطانیہ لائیڈ جارج سے وعدہ لیا کہ جنگ کے دوران میں مسلمانوں کے مقاماتِ مقدسہ کی بے حرمتی نہیں ہو گی اور جنگ کے بعد مسلمانوں کی خلافت محفوظ رہے گی۔ جرمنی کو شکست اور برطانیہ کو فتح ہوئی۔ جنگ کے خاتمے کے بعد برطانیہ اور اس کے اتحادیوں نے وعدہ خلافی کرتے ہوئے اپنی فوجیں بصرہ اور جدہ میں داخل کر دیں۔ ہندوستان کے مسلمانوں نے انگریزوں کو وعدے یاد دلانے کے لیے اور خلافت کے تحفظ کے لیے ایک تحریک شروع کی جسے ”تحریکِ خلافت“ کا نام دیا گیا۔

تبصرہ

یہ کلام سیاسی خودداری اور قوتِ بازو کے قرآنی فلسفے کا دوٹوک منشور ہے۔ علامہ اقبال نے واضح کِیا ہے کہ خلافت یا سیاسی اقتدار کوئی ایسی شے نہیں جو استعماری فاتحین کی چوکھٹ پر گڑگڑا کر یا بھیک مانگ کر حاصل کی جا سکے؛ جب تک قوم اپنے خون اور اجتماعی طاقت سے اپنے وجود کا لوہا نہیں منواتی، سامراج کے رحم و کرم پر جینا مستقل غلامی کو گلے لگانے کے مترادف ہے۔

حوالہ جات

• شرح بانگِ درا از پروفیسر یوسف سلیم چشتی
• شرح بانگِ درا از ڈاکٹر خواجہ حمید یزدانی
• شرح بانگِ درا ا ڈاکٹر شفیق احمد
• شرح بانگِ درا از اسرار زیدی

مزید مطالعہ فرمائیے

ترانۂ مِلّی اور ترانۂ ہندی: ایک تقابلی جائزہ

بانگِ درا 49: التجائے مسافر

بانگِ درا 82: تنہائی

ضربِ کلیم 74: آگاہی

ضربِ کلیم 125: اہرامِ مِصر

بالِ جبریل 127: ہسپانیہ