بانگِ درا 102: وطنیّت

اِس دور میں مے اور ہے، جام اور ہے جم اور
ساقی نے بِنا کی روِشِ لُطف و ستم اور

تشریح:

علامہ اقبال فرماتے ہیں کہ آج کے زمانے میں شراب بھی نئی ہے، شراب پینے کا برتن بھی نیا ہے اور شراب پلانے والے لوگ بھی نئے ہیں۔ شراب پلانے والے (ساقی) نے بھی مہربانیوں اور مظالم کے ایک مخلتف اور نئے انداز کی بنیاد رکھی ہے۔ مراد یہ ہے کہ موجودہ زمانہ میں سیاست اور حکومت کے طور طریقے بالکل بدل گئے ہیں اور اربابِ حکومت نے بھی لوگوں پر مہربانی اور ستم کے طریقے بدل دیے ہیں۔

مسلم نے بھی تعمیر کِیا اپنا حرم اور
تہذیب کے آزر نے ترشوائے صنم اور

تشریح:

اِن سب لوگوں کی دیکھا دیکھی مسلمانوں نے بھی اپنے لیے نیا کعبہ تعمیر کرلیا ہے اور تہذیب کے بت تراش نے ان سے نئے نئے بت ترشوالیے ہیں یعنی مسلمانوں نے بھی اپنے لیے دوسرے لوگوں کی طرح تہذیب کے نام پر بہت سی چیزوں کو اپنا معبود مان لیا۔

ان تازہ خداؤں میں بڑا سب سے وطن ہے
جو پیرہن اس کا ہے، وہ مذہب کا کفن ہے

تشریح:

موجودہ مغربی تہذیب نے انسانوں کی پرستش کے لیے جو نئے نئے معبود (صنم) یعنی مسلک ایجاد کیے ہیں۔ ان نئے معبودوں میں وطن، سب سے بڑا معبود ہے، جو آج اللہ کا مدِمقابل بنا ہوا ہے اور اس نئے خدا (وطن) کے پیش کردہ اصول اس طرح کے ہیں کہ ان کے اختیار کرنے سے دینِ اسلام فنا ہوجاتا ہے (وطن ایک ایسا خدا ہے کہ اِس کا لباس مذہب کے لیے کفن کی حیثیت رکھتا ہے یعنی وطن کی پرستش کا لازمی نتیجہ مذہب کی موت کی صورت میں سامنے آتا ہے)۔

یہ بُت کہ تراشیدۂ تہذیبِ نوی ہے
غارت گرِ کاشانۂ دینِ نبَوی ہے

تشریح:

یہ بُت (جدید تصوّرِ وطنیت) جسے جدید مغربی تہذیب نے تراشا ہے، رسول اکرم ﷺ کے دین کو تباہ کرنے والا بت ہے۔ اِس تصور (یعنی وطنیّت بحیثیت ایک سیاسی تصور کے) کے باعث مسلمان اسلام سے دور ہوتے جارہے ہیں اور یہ امر اسلام کی عظمت کو بری طرح متاثر کررہا ہے۔

بازو ترا توحید کی قوّت سے قوی ہے
اسلام ترا دیس ہے، تُو مصطفوی ہے

تشریح:

اے مسلمان! چونکہ تُو موحد (اللہ تعالی کی وحدانیت کا اقرار کرنے والا) ہے اور عقیدۂ توحید (اللہ تعالی کو ایک ماننا) نے تیرے اندر کافی طاقت پیدا کردی ہے، اس لیے تُو اس بت (وطن) کا مقابلہ کرنے کے لیے تیار ہوجا۔ تیرا وطن نہ مشرق ہے نہ مغرب، بلکہ اسلام ہے اور اسلام زمان و مکان کی قیود سے بالاتر ہے۔ تُو نہ ایرانی ہے نہ عراقی، نہ ہندی نہ پاکستانی، بلکہ مصطفوی ہے، یعنی نبی اکرم ﷺ کا غلام ہے۔ تیرا روحانی تعلق کسی ملک سے نہیں بلکہ سرکارِ دوعالم ﷺ کی ذات پاک سے ہے۔

نظّارۂ دیرینہ زمانے کو دِکھا دے
اے مصطفَوی خاک میں اس بُت کو ملا دے!

تشریح:

پس تُو اُٹھ اور اس بت (وطن پرستی کا بُت) کو پاش پاش کرکے، بُت شکنی کا وہی پرانا نظارہ دنیا کو دکھا دے جو کبھی تیرے اسلاف نے دنیا کو دکھایا تھا۔

ہو قیدِ مقامی تو نتیجہ ہے تباہی
رہ بحر میں آزادِ وطن صُورتِ ماہی

تشریح:

اگر تُو اپنے آپ کو کسی خاص ملک سے وابستہ کرلے گا تو اِس کا نتیجہ بربادی کے علاوہ اور کچھ نہیں ہے یعنی تُو مسلمان کی حیثیت سے ختم ہوجائے گا۔ تُو دنیا میں مچھلی کی طرح رہ، کہ وہ سارے سمندر کو اپنا ملک سمجھتی ہے، تُو بھی ساری دنیا کو اپنا وطن سمجھ، یعنی دنیا میں اسلام کا علم بلند کر اور اگر ضرورت پڑے تو ترکِ وطن کردے۔

؎ چین و عرب ہمارا، ہندوستاں ہمارا
مسلم ہیں ہم، وطن ہے سارا جہاں ہمارا
(بانگِ درا: ترانۂ ملی)

ہے ترکِ وطن سُنّتِ محبوبؐ الٰہی
دے تُو بھی نبوّت کی صداقت پہ گواہی

تشریح:

اعلیٰ اصولوں اور بلند نصب العین کے لیے وطن کو چھوڑ دینا پیارے نبی اکرم ﷺ کی سنتِ مبارک ہے، لہذا تجھے نبوت کی سچائی پر گواہی دینا چاہیے یعنی اگر ضرورت پیش آئے تو اپنے نصب العین پر وطن کو قربان کردے۔ اِس بات سے علامہ اقبال کا اشارہ آپ ﷺ کی ہجرت کی طرف ہے۔ جب مکہ مکرمہ میں اسلامی زندگی بسر کرنا دشوار ہوگئی تو آپ ﷺ نے یثرب (مدینہ منورہ) کی طرف ہجرت فرمائی، اس طرح ہجرت سُنتِ نبوی قرار پائی۔ پس اگر تُو دیکھے کہ اپنے وطن میں اسلامی زندگی بسر کرنی دشوار ہے تو تُو وطن کو ترک کردے اور پردیس کو اپنا وطن بنالے۔ تُو جِس ملک میں جائے گا، وہی تیرا وطن بن جائے گا کیونکہ:-

؏ مسلم ہیں ہم، وطن ہے سارا جہاں ہمارا

گُفتارِ سیاست میں وطن اور ہی کچھ ہے
ارشادِ نبوّت میں وطن اور ہی کچھ ہے

تشریح:

یاد رکھ کہ سیاست کی اصطلاح میں وطن کا مفہوم بالکل مختلف ہے اس مفہوم سے، جو اسلام پیش کرتا ہے، بلکہ یہ دونوں ایک دوسرے کی ضد ہیں۔

سیاست میں وطن کا مفہوم یہ ہے کہ ہر شخص جس ملک میں پیدا ہوا ہے، وہ ملک اُس کا دائمی وطن ہے اور اس کا فرض یہ ہے کہ اپنے وطن کے لیے جیے اور وطن کے لیے مرے۔

اسلام میں وطن کا مفہوم یہ ہے کہ وطن سے محبت کرو اور پھر اس کی حفاظت کرو لیکن اگر تم وطن میں اللہ کا کلمہ بلند نہیں کرسکتے تو پھر ترکِ وطن (ہجرت) کردو کیونکہ مقصدِ حیات (زندگی کا مقصد) وطن نہیں ہے، بلکہ اللہ تعالی ہیں۔مسلمان وہ ہے جو اللہ تعالی کے لیے جیتا اور اُنہی کے لیے مرتا ہے۔

یہ دونوں مفہوم ایک دوسرے کی ضد ہیں، اِس لیے ایک مسلمان سیاسی اصطلاح میں وطن پرست ہرگز نہیں ہوسکتا کیونکہ وطن پرستی اور خدا پرستی— یہ دونوں باتیں ایک جگہ جمع نہیں ہوسکتیں۔

اقوامِ جہاں میں ہے رقابت تو اسی سے
تسخیر ہے مقصودِ تجارت تو اسی سے

تشریح:

آج دنیا کی مختلف اقوام، اسی وطنیت کی بدولت، ایک دوسرے کی دشمن ہوگئی ہیں۔ روسی اپنے وطن کو دنیا میں سربلند کرنا چاہتے ہیں، امریکی اپنے وطن کو، انگریز اپنے وطن کو، جرمن اپنے وطن کو، یعنی ہر ایک اپنے وطن کو معبود سمجھتا ہے لیکن مسلمان کا راستہ سب سے جُدا ہے، وہ نہ اِس مُلک کی سربلندی کا خواہاں ہے، نہ اُس کی۔ وہ تو بس اللہ تعالی کے نام کو دنیا میں سربلند کرنا چاہتا ہے۔

بہرحال وطنیت کے مفاسد (عیوب) بہت ہیں۔ اُن میں سے پہلا یہ ہیں کہ اِس وجہ سے اقوامِ عالم میں دشمنی پیدا ہوتی ہے۔ دوسرا یہ کہ تجارت سے ان اقوام کا مقصد تجارت نہیں، بلکہ اس ملک کو فتح کرنا ہوتا ہے جس میں یہ اپنی تجارت کا جال بچھاتی ہیں۔ یورپین اقوام جس ملک میں تجارت کا سلسلہ شروع کرتی ہیں، رفتہ رفتہ اُسے اپنا غلام بنالیتی ہیں۔

خالی ہے صداقت سے سیاست تو اسی سے
کمزور کا گھر ہوتا ہے غارت تو اسی سے

تشریح:

تیسرا عیب یہ ہے کہ اِس نظریہ وطنیت کی رو سے سیاست میں ہر قسم کا مکر و فریب جائز ہے۔ آج کی سیاست میں جو صداقت و راست باز نہیں ہے (چالبازی اور فریب کاری اس میں سموئی ہوئی ہے) تو اس کی وجہ بھی وطنیت ہے۔ کسی کمزور قوم کا گھر یا ملک غارت ہوتا ہے تو وہ بھی اسی وجہ سے ہے۔ برِصغیر میں مسلمان کمزور ہوچکے تھے، جس کا فائدہ انگریز نے اُٹھایا۔ چنانچہ اس کو سیاسی اصطلاح میں ڈپلومیسی کہتے ہیں۔ مقصد یہ ہے کہ عیاری اور فریب کاری سے کمزور اقوام کو اپنا غلام بنایا جائے۔

اقوام میں مخلوقِ خدا بٹتی ہے اس سے
قومیّتِ اسلام کی جڑ کٹتی ہے اس سے

تشریح:

چوتھا عیب (اعتراض) یہ ہے کہ اِس نظریہ کی رو سے، اللہ کی مخلوق، مختلف قوموں میں منقسم (بٹ جانا، تقسیم ہوجانا) ہوجاتی ہے اور وہ قومیں ایک دوسرے کی دشمن بن جاتی ہیں۔ یعنی بنی آدم، آدم علیہ السلام کی اولاد، جو سب اللہ کے بندے ہیں، ایک دوسرے کے دشمن بن جاتے ہیں اور اللہ کی بجائے اپنے وطن کی عبادت کرتے ہیں۔ اس کا نتیجہ یہ نکلتا ہے کہ ”اسلامی قومیّت“ جو قرآنِ حکیم کا مقصود ہے، دنیا میں کبھی قائم نہیں ہوسکتی۔ اسلام تو یہ چاہتا ہے کہ ساری دنیا کے مسلمان ایک بن جائیں۔

؏ نیل کے ساحل سے لے کر تابخاکِ کاشغر
(بانگِ درا: خضرِ راہ)

لیکن نظریۂ وطنیت یہ سکھاتا ہے کہ پاکساتانی جداگانہ قوم ہیں، افغانی جداگانہ، ایرانی جداگانہ، عراقی جداگانہ، مصری جداگانہ، یعنی:-

؏ قومیتِ اسلام کی جڑ کٹتی ہے اس سے

یہی وجہ ہے کہ علامہ اقبال نے ساری عمر اپنی پوری قوت کے ساتھ وطنیت کے اس غیر اسلامی نظریہ کی تردید کی اور ”بانگِ درا“ سے لے کر ”ارمغانِ حجاز“ تک ہر کتاب میں اس کے مقاصد واضح کردیے۔