بانگِ درا 72: چاند اور تارے

ڈرتے ڈرتے دمِ سحر سے
تارے کہنے لگے قمر سے

تشریح:

طلوعِ آفتاب کا وقت قریب پہنچ رہا تھا اور سحر کی پھونک (دمِ سحر) تاروں کی روشنی کی شمع کو گُل کر دینے والی تھی۔ ستارے اسی خدشے کو دِل میں لیے ہوئے چاند (قمر) سے یوں مخاطب ہوئے:-

نظّارے رہے وہی فلک پر
ہم تھک بھی گئے چمک چمک کر

تشریح:

اے چاند! یہ تو بتا کہ ہم جو چمک چمک کر تھک چُکے ہیں، مگر اس کے باوجود آسمان کے نظاروں میں کوئی تبدیلی نہیں آئی۔

کام اپنا ہے صبح و شام چلنا
چلنا، چلنا، مدام چلنا

تشریح:

ہمارا کام صبح و شام سفر میں رہنا ہے۔ چلنا، چلنا اور مسلسل چلتے رہنا ہے (تارے ہمیشہ گردِش میں رہتے ہیں، اس لیے ایسا کہا ہے)۔

بے تاب ہے اس جہاں کی ہر شے
کہتے ہیں جسے سکُوں، نہیں ہے

تشریح:

اے چاند! اِتنا بتا دے کہ اِس عالمِ رنگ و بُو کی ہر شے تغیّر سے کیوں دو چار ہے؟ اِن کے اضطراب (بے چینی و بے قراری) میں کمی کیوں نہیں آتی؟ آخر کیوں انہیں سکون حاصل نہیں ہوتا؟

رہتے ہیں ستم کشِ سفر سب
تارے، انساں، شجر، حجر سب

تشریح:

یہاں سب سفر کی سختیاں جھیل رہے ہیں۔ تارے ہوں یا انسان، درخت ہوں یا پتھر، کوئی بھی اِن سختیوں سے بچا ہوا نہیں۔

ہوگا کبھی ختم یہ سفر کیا
منزل کبھی آئے گی نظر کیا

تشریح:

آخر اتنا تو ہمیں پتہ چلے کہ یہ سفر کبھی اور کسی مرحلے پر جا کر ختم بھی ہوگا اور کبھی ہم اپنی منزلِ مقصود کو بھی دیکھ سکیں گے یا نہیں۔

مراد یہ ہے کہ ستاروں کے الفاظ میں اِس کائنات کی ہر شے تغیّر پذیر ہے، کسی کو بھی سکون حاصل نہیں! سفر جاری ہے اور منزل ناپید!

کہنے لگا چاند، ہم نشینو
اے مزرعِ شب کے خوشہ چینو!

تشریح:

اب علامہ اقبال چاند کی زبان سے ستاروں کے سوال کا جواب دیتے ہیں:-

چاند، جو بڑی خاموشی سے اُن ستاروں کی باتیں سُن رہا تھا، یوں گویا ہوا کہ اے ہم نشینو! اے رات کی فصل سے خوشے چُننے والو! میری بات غور سے سنو!

جُنبش سے ہے زندگی جہاں کی
یہ رسم قدیم ہے یہاں کی

تشریح:

حرکت و گردِش ہی کی بدولت اس کائنات کی زندگی کا کاروبار چل رہا ہے اور یہ کوئی آج کی بات نہیں بلکہ یہ انداز اور طور طریقہ تو ازل سے چلا آ رہا ہے۔

ہے دوڑتا اشہبِ زمانہ
کھا کھا کے طلب کا تازیانہ

تشریح:

زمانے کا گھوڑا (اشہب) طلب و خواہش کا کوڑا کھا کھا کر ہی دوڑتا ہے۔ گویا اعلیٰ مقصد اور اس کے حصول کے لیے مسلسل جہد و عمل میں مصروف رہنا ہی حقیقی زندگی ہے، اس کے بغیر زندگی کی کوئی حیثیت و حقیقت نہیں۔

؎ جس میں نہ ہو انقلاب، موت ہے وہ زندگی
روحِ اُمم کی حیات، کشمکشِ انقلاب!
(بالِ جبریل: مسجدِ قرطبہ)

اس رہ میں مقام بے محل ہے
پوشیدہ قرار میں اجل ہے

تشریح:

اِس راستے میں ٹھہرنے یا منزل / پڑاؤ کا سوچنا بھی ایک بے موقع بات ہے، اس لیے کہ قرار میں موت پوشیدہ ہے۔ جوکوئی انسان اپنی زندگی کو حقیقی اور با مقصد زندگی بنانے کے لیے جہد و عمل نہیں کرتا اور جمود ہی کا شکار رہتا ہے یا سکون و قرار ہی کو زندگی سمجھتا ہے، وہ در حقیقت ایک چلتی پھرتی لاش کے سِوا اور کُچھ نہیں ہے۔

؎ سکُوں محال ہے قدرت کے کارخانے میں
ثبات ایک تغیّر کو ہے زمانے میں
(بانگِ درا: ستارہ)

چلنے والے نِکل گئے ہیں
جو ٹھہرے ذرا، کُچل گئے ہیں

تشریح:

مسلسل جہد و عمل کرنے والے آگے بڑے گئے ہیں، وہ صاحبِ بقا بن گئے ہیں۔ اِس کے برعکس رُکنے والے یعنی سعی و عمل سے بیگانہ انسان کُچلے گئے ہیں، اُن کا وجود بے حقیقت و حیثیت ہو کر رہ گیا۔

واضح ہو کہ علامہ اقبال کے کلام میں عمل پر بہت زور دیا گیا ہے۔

انجام ہے اس خرام کا حُسن
آغاز ہے عشق، انتہا حُسن

تشریح:

اِس خرام (جہد و عملِ پیہم) کا انجام حُسن ہے۔ اِس کا آغاز تو عشق ہے اور انتہا حُسن ہے۔

عشق سے مُراد ہے تلاش و جستجو اور جد و جہد کا سچّا ذوق؛ حُسن سے مراد ہے درجۂ کمال حاصل کر لینا۔ اس نظم میں حرکت اور جد و جہد کی تعلیم دی گئی ہے۔ اسی تعلیم کے لیے اقبالؔ نے اپنی زندگی وقف کی۔ یہاں اس دعوت کی ابتدائی جھلک ملتی ہے، جس کے جلووں سے اقبالؔ کا سارا کلام لبریز ہے۔

جد و جہد کا نتیجہ یہ نکلتا ہے کہ انسان کے اندر کمال (حُسن) پیدا ہوتا ہے۔ پس جو شخص مرتبۂ کمال (حُسن) پیدا کرنا چاہتا ہے، اُسے لازم ہے کہ اپنے نصب العین سے عشق اختیار کرے۔ عشق انسان کو کامیابی سے ہمکنار کرتا ہے۔

چنانچہ حرکت اور روانی ہی ہر شے کو سنوارتی ہے۔ اسی عمل کو حُسن سے تعبیر کیا جا سکتا ہے۔ کائنات کی جملہ اشیاء عشق کی بدولت حرکت میں رہتی ہیں اور آخر میں سنوَر کر حُسن کا رُوپ دھار لیتی ہیں۔