ارمغانِ حجاز 5: معزول شہنشاہ

ہو مبارک اُس شہنشاہِ نِکو فرجام کو
جس کی قربانی سے اسرار ملوکیّت ہیں فاش

تشریح:

علامہ اقبال کہتے ہیں کہ اُس بادشاہ کو مبارک ہو جس نے اپنی ذاتی محبت اور ضمیر کی آواز پر عمل کرتے ہوئے تخت و تاج کی قربانی دی۔ اِس عمل سے بادشاہت کے راز اور حقیقت آشکار ہوئی، یعنی یہ واضح ہو گیا کہ بادشاہی صرف ایک مصنوعی علامت ہے، اور اُس کی حقیقی طاقت یا حیثیت اصل میں حکومتی مشیروں اور اشرافیہ کے قبضے میں ہے۔

’شاہ‘ ہے برطانوی مندر میں اک مٹّی کا بُت
جس کو کر سکتے ہیں، جب چاہیں پُجاری پاش پاش

تشریح:

اقبالؔ یہاں برطانوی بادشاہت کی مصنوعی اور علامتی حیثیت کو بیان کر رہے ہیں۔

وہ کہتے ہیں کہ انگلستان میں بادشاہ ایک مٹی کے بُت کی مانند ہے جسے عوام، وزرا، مشیر اور چرچ کے لوگ بہ ظاہر عزت دیتے ہیں، لیکن دراصل اس کی کوئی حقیقی طاقت یا اختیار نہیں۔ ایڈوَرڈ ہشتم کی تخت و تاج سے دستبرداری نے یہ راز آشکار کر دیا کہ بادشاہ کی قدر و حیثیت حکومتی مشیروں اور چرچ کے اختیار میں ہے، اور وہ جب چاہیں بادشاہ کو تخت سے ہٹا سکتے ہیں۔

یہ شعر اِس بات پر بھی روشنی ڈالتا ہے کہ بادشاہ ذاتی پسند یا محبت کے فیصلے بھی آزادانہ طور نہیں کر سکتا؛ اُس کے کردار اور انتخاب حکومت اور مذہبی اداروں کے دائرۂ اختیار میں محدود ہیں۔

ہے یہ مُشک آمیز افیوں ہم غلاموں کے لیے
ساحرِ انگلیس! مارا خواجۂ دیگر تراش

تشریح:

بادشاہ کی تخت سے دستبرداری سے انگلستان میں نظامِ بادشاہت کا یہ راز کھُل کر سامنے آ گیا ہے کہ وہاں بادشاہت کا نظام غلام قوموں کو پھانسنے اور قابو میں رکھنے کے لیے قائم کِیا گیا ہے، یہ ایک ایسی نشہ آور چیز (افیون) کی مانند ہے جس میں مُشک کی یا خوشبو کی مِلاوٹ کر دی گئی ہے تاکہ کھانے والا‘ افیون سمجھ کر چھوڑ نہ دے بلکہ کھا لے اور اِس کے نشہ سے عالمِ غنودگی میں رہے۔ مراد ہے عمل سے بیگانہ رہے۔

چنانچہ اے انگریز جادوگر! (پہلا بادشاہ تو معزول ہوگیا) لہذا ہمارے لیے اب نیا بُت تراش کر (نیا آقا لاؤ)۔ علامہ نے بھرپور طنز کے ساتھ برطانوی حکمرانوں کو انگریز جادوگر کہہ کر اپنے یعنی برِصغیر والوں کے لیے آقا کی صورت میں نیا بُت تراشنے کو کہا ہے۔ یعنی ایسا نیا بادشاہ تخت پر بٹھاؤ اور ہم غلاموں کا دِل لُبھاؤ۔

یہ طنز صرف انگریزوں پر نہیں، خود غلاموں پر بھی ہے۔ غلامی کی عادت اِس قدر پُختہ ہو چُکی ہے کہ پہلا بُت ٹوٹنے پر بھی غلام آزادی کی طرف نہیں دیکھتے، بلکہ نئے آقا کا مطالبہ کرنے لگتے ہیں۔ گویا افیون کا نشہ ایسا رچ بس گیا ہے کہ اس کے ٹوٹنے پر بھی ہوش میں آنے کے بجائے نئی خوراک کی طلب باقی رہتی ہے۔