بانگِ درا 77: نوائے غم

زندگانی ہے مری مثلِ ربابِ خاموش
جس کی ہر رنگ کے نغموں سے ہے لبریز آغوش

تشریح:

میری زندگی ایک خاموش سارنگی کی مانند ہے جس کی گود ہر طرح کے نغموں سے بھری پڑی ہے۔ یعنی مجھ میں نغمگی کی صلاحیت تو ہے (یا مجھ میں مختلف صلاحیتیں ہیں یا بہت سے تخیلات ہیں) لیکن اسے (انہیں) ظاہر میں نہیں لاتا۔

”خاموش رباب“ یعنی وہ ساز جس میں ہر قسم کے نغمے تو موجود ہوں لیکن اسے بجایا نہ گیا ہو (ساز کو جب تک بجایا نہ جائے تب تک اُس میں سُر تال پیدا نہیں ہوتے)۔

بربطِ کون و مکاں جس کی خموشی پہ نثار
جس کے ہر تار میں ہیں سینکڑوں نغموں کے مزار

تشریح:

میں ایسا ساز ہوں جو اگرچہ خاموش ہے، لیکن اُس کی خاموشی پر ساری دُنیا کے نظام کا وہ ساز کہ جس کا ہر سُر دِل بستگی کا آئینہ دار ہے، بھی قربان جاتا ہے۔ میں وہ خاموش ساز ہوں جس کے ہر تار میں سینکڑوں ہزاروں نغمے دفن ہی (پہلے شعر کے خیال ہی کو دہرایا گیا ہے)۔

محشرستانِ نوا کا ہے امیں جس کا سکُوت
اور منّت کشِ ہنگامہ نہیں جس کا سکُوت

تشریح:

میں جانتا ہوں کہ اس ساز کی (یعنی میری) چُپ میں بھی قیامت کا راگ چھُپا ہوا ہے۔

یہ خاموش ساز ایسی نواؤں کا مظہر ہے جو اہلِ دل کے سینے میں حشر برپا کر دیتی ہیں اور اُس کی اِس چُپ نے کبھی شور و غُل یا ہنگامے کا احسان نہین اُٹھایا۔

آہ! اُمیّد محبت کی بر آئی نہ کبھی
چوٹ مضراب کی اس ساز نے کھائی نہ کبھی

تشریح:

افسوس کہ محبت کی امید کبھی پوری نہ ہوئی اور میرے اس ساز (زندگی) نے کبھی مضراب کی چوٹ نہ کھائی، یعنی محبت میں کامیابی حاصل نہ ہونے کے باعث میری خاموشی کبھی گویائی میں تبدیل نہ ہوئی۔

مگر آتی ہے نسیمِ چمنِ طُور کبھی
سمتِ گردُوں سے ہوائے نفَسِ حُور کبھی

تشریح:

اگرچہ محبت کی میری اُمید کبھی شرمندہ تکمیل نہ ہوئی، لیکن اس کے باوجود کبھی کبھی ایسا ہوتا ہے کہ طُورِ سینا سے عشقِ حقیقی کی ایک لہر میرے دِل کے دروازے تک پہنچ جاتی ہے اور کبھی حور کی سانس کی معطر ہوا کی مجھ تک رسائی ہو جاتی ہے۔

طُورِ: طُورِ سینا؛ وہ پہاڑ جس پر حضرت موسیؑ اللہ تعالی سے ہم کلام ہوئے۔

چھیڑ آہستہ سے دیتی ہے مرا تارِ حیات
جس سے ہوتی ہے رِہا رُوحِ گرفتارِ حیات

تشریح:

یہ سب مل کر قدرے آہستگی سے میری زندگی کے ساز کے تار چھیڑ دیتی ہیں (گویا یہ ہوائیں مضراب کا کام دیتی ہیں)، یوں میرے ساز سے نغمے نکلنے لگتے ہیں اور زندگی کے دام میں گرفتار روح ہر طرح کی بندِشوں سے آزاد ہو جاتی ہے۔

نغمۂ یاس کی دھیمی سی صدا اُٹھتی ہے
اشک کے قافلے کو بانگِ درا اُٹھتی ہے

تشریح:

لیکن میری یہ کیفیت زیادہ دیر تک نہیں رہتی اور غم و اندوہ (یاس) میں ڈوبی ہوئی ایک دھیمی سی آواز میرے کانوں سے ٹکراتی ہے۔ یہ آواز میرے آنسوؤں کے قافلے کے لیے گویا گھنٹی کی آواز (بانگِ درا) کا کام کرتی ہے، کہ جس کے بجتے ہی میری آنکھوں سے اشکوں کا قافلہ رواں ہو جاتا ہے۔

اِس شعر کا دوسرا مطلب یہ بھی ہو سکتا ہے کہ اگرچہ محبوب کی کُوچے کی طرف سے آنے والی ہوا وقتی طور پر خوشی دیتی ہے، لیکن محبوب سے جُدائی اور محرومی کا خیال اس خوشی کو غم میں تبدیل کر دیتا ہے اور میں پھر سے غمگین ہو جاتا ہوں۔

واضح ہو کہ افکارِ اقبالؔ میں خوشی سے زیادہ غم کو، اور وصل (محبوب کو حاصل کر لینا) سے زیادہ فراق (جُدائی) کو اہمیت حاصل ہے۔ بالِ جبریل میں فرماتے ہیں:-

؎ عالمِ سوز و ساز میں وصل سے بڑھ کے ہے فراق
وصل میں مرگِ آرزو، ہجر میں لذّتِ طلب
(بالِ جبریل: ذوق و شوق)

یعنی عشق کی دُنیا میں جُدائی کو وصل پر فوقیت حاصل ہے۔ وصل آرزو کی موت ہے کیونکہ وصل میں آرزو کی تکمیل ہو جاتی ہے اور جس آرزو کی تکمیل ہو جائے وہ باقی نہیں رہتی، لیکن جُدائی میں طلب کی لذت حاصل رہتی ہے اور عاشق کے لیے محبوب کی لذتِ طلب سے بڑھ کر زندگی کی کوئی لذت نہیں ہے۔

؎ گرمیِ آرزو فراق، شورشِ ہاے و ہُو فراق
مَوج کی جُستجو فراق، قطرے کی آبرو فراق!
(بالِ جبریل: ذوق و شوق)

یعنی آرزو کی گرمی جدائی ہی کی بدولت قائم رہتی ہے اور جدائی ہی نالہ و فریاد کا باعث ہے۔ دیکھو موج ہر وقت بے قرار رہتی ہے اور قطرے کی آبرُو بھی جُدائی کے سِوا کُچھ نہیں۔ کیونکہ جب تک موج اور قطرہ دریا سے الگ رہیں، اُن دونوں کی ہستی قائم رہتی ہے۔

جس طرح رفعتِ شبنم ہے مذاقِ رم سے
میری فطرت کی بلندی ہے نوائے غم سے

تشریح:

اس طرح دیکھا جائے تو معلوم ہوگا کہ جس طرح شبنم اُڑ جانے (یعنی چلنے اور سفر کرنے) کے ذوق کی بدولت زمین کی پستیوں سے نِکل کر آسمان کی بلندیوں تک جا پہنچتی ہے، اُسی طرح غم و اندوہ اور ناکامی و نامرادی کے گیت کے باعث انسان کی فطرت میں بلندی پیدا ہوتی ہے۔ مطلب یہ ہے کہ انسان کی بلندی کا راز سوز و گُداز میں ہے۔ اُسے چاہیے کہ اپنے ہم جنسوں سے گھُل گھُل کر درد بھرے ترانے گاتا رہے۔ بانگِ درا میں فرماتے ہیں:-

؎ حادثاتِ غم سے ہے انساں کی فطرت کو کمال
غازہ ہے آئینۂ دل کے لیے گردِ ملال
(بانگِ درا: فلسفۂ غم)

غم سے متعلق یہ اشعار بھی ملاحظہ ہوں:-

غالبؔ:-

؎ شادی سے گزر کہ غم نہ ہووے
اُردی جو نہ ہو، تو دَے نہیں ہے
(شادی: خوشی، اُردی: موسمِ بہار، دَے: خزاں)

فانی بدیوانیؔ:-

؎ غم بھی گذشتنی ہے، خوشی بھی گذشتنی
کر غم کو اختیار کہ گزرے تو غم نہ ہو
(گذشتنی: گزر جانے والا / عارضی)

حافظؔ:-

؎ چہ شکر گویمت اے خیلِ غم عفاک اللہ
کہ روزِ بیکسی آخر نمی روی ز سرم
ترجمہ: اے غم کے لشکر! میں تیرا کیا شکریہ ادا کروں، اللہ تجھے سلامت رکھے، کہ بے کسی اور تنہائی کے دن بھی آخر تُو میرے سر سے نہیں جاتا (میرا ساتھ نہیں چھوڑتا)۔

داغؔ:-

؎ گئے ہیں رنج و غم اے داغ بعدِ مرگ ساتھ اپنے​
اگر نکلے تو یہ اپنے رفیقانِ عدم نکلے​